Launakröfur Gary ekki óraunhæfar
Víkingar höfðu í vetur betur gegn öðrum félögum í baráttu um Gary Martin sem kom frá KR. Voru það peningarnir sem höfðu lykiláhrif þar?

„Menn sem eru atvinnumenn eins og hann kosta sitt. Mér finnst hans launakröfur ekki óraunhæfar. Við vorum frekar tilbúnir að taka menn sem hafa sannað sig heldur en að hjóla í eitthvað blint. Við vissum að við myndum ekki finna striker á Íslandi sem okkur vantaði."

Víkingur mætir KR í úrslitum Lengjubikarsins annað kvöld og þann 2. maí mætast sömu lið í Vesturbænum í 1. umferð í Pepsi-deildinni. Gary fer þá á sinn gamla heimavöll.

„Að sjálfsögðu eru tilfinningar þegar þú spilar á móti liði sem þú hefur spilað áður með og unnið titla með. Hann er spenntur fyrir þessum leik en hann má ekki vera of spenntur. Hann getur alveg stjórnað spennustiginu. Hann getur gírað sig rétt fyrir leik án þess að vera of spenntur," sagði Milos.

Igor skilur breytinguna á fyrirliða
Milos hefur prófað nokkur leikkerfi með Víking í sumar en hann segist vera óhræddur við að skipta um kerfi.

„Við spilum út frá því hvað við í þjálfarateyminu teljum best í hverjum leik. Ég er ekki fastur í taktík. Ég spila það sem leikmenn treysta sér og fer eftir hæfileikum leikmanna. Ef ég er með tvo góða strikera þá spila ég 4-4-2," sagði Milos.

Viktor Bjarki Arnarsson er nýr fyrirliði Víkings en hann tekur við bandinu af Igor Taskovic sem var fyrirliði í fyrra.

„Það er ekkert fótboltalega séð að hjá Igor eða eitthvað svoleiðis. Viktor er hér tólf mánuði á ári en Igor er það ekki. Igor skilur þetta. Þeir eru báðir fyrirliðar og mín hægri og vinstri hönd á vellinum. Viktor hefur ekki misst af neinni æfingu og mér finnst þetta vera eðlilegt. Igor var sammála því."

Leitar oft ráða hjá Óla Þórðar
Milos hafði þjálfað lið Víkings ásamt Ólafi Þórðarsyni áður en hann tók einn við liðinu um mitt sumar í fyrra.

„Ég hef leitað oft ráða hjá Óla Þórðar því hann er reynslumikill og hefur atriði sem ég er ekki með. Hann hefur tekið vel á móti því. Mér finnst þjálfurum hér vanta að geta fengið leiðbeiningar hjá reyndari þjálfurum. Erlendis hafa menn mentora sem þeir geta hringt í. Ég hef líka hringt í erlenda þjálfara en alltaf þegar ég er í einhverjum vafi þá hringi ég í Óla og við spjöllum saman."

Fótbolti.net hefur spurt þjálfarana í Pepsi-deildinni undanfarið að því hvaða leikmann þeir myndu taka inn í hópinn ef þeir mættu velja einn úr öðru liði í deildinni.

„Ég myndi ekki orða það þannig að þetta sé leikmaður sem ég vil fá en Óskar Örn er í miklum metum hjá mér. Hann er X-faktor leikmaður, öðruvísi leikmaður. Ég ítreka samt að ég er ekki að pæla í honum, svo KR-ingar misskilji það ekki," sagði Milos.

Hér að ofan má sjá viðtalið í heild sinni.