Spánn: Hasar og rautt spjald í El Clasico - Bellingham skoraði og lagði upp

Real Madrid fékk Barcelona í heimsókn í El Clasico erkifjendaslagnum í spænsku deildinni í dag.

Kylian Mbappe skoraði glæsilegt mark með skoti fyrir utan teiginn eftir rúmlega tíu mínútna leik en hann var hársbreidd fyrir innan þegar hann fékk sendinguna og rangstaða því dæmd.

Aðeins tíu mínútum síðar sendi Jude Bellingham Mbappe í gegn og hann kom Real Madrid yfir.

Real Madrid fékk betri færi í fyrri hálfleik en Barcelona náði að jafna þegar skammt var til loka fyrri hálfleiksins. Liðið vann boltann við vítateig Real Madrid og Marcus Rashford sendi boltann út í teiginn og Fermin Lopez skoraði og jafnaði metin.

Real Madrid var hins vegar með forystuna í hálfleik þar sem Jude Bellingham kom liðinu aftur yfir eftir að Eder Militao skallaði boltann fyrir fætur Bellingham sem var í dauðafæri og skoraði á opið markið.

Snemma í seinni hálfleik fékk Real Madrid gullið tækifæri til að bæta við forystuna þegar liðið fékk vítaspyrnu þar sem boltinn fór í höndina á Eric Garcia.

Kylian Mbappe steig á punktinn en Wojciech Szczesny gerði sér lítið fyrir og varði spyrnuna frá honum.

Barcelona reyndi að jafna metin en náði ekki að skapa sér almennileg færi. Pedri fékk að líta sitt annað gula spjald og þar með rautt í blálokin þegar hann braut á Aurelien Tchouameni.

Strax í kjölfarið skapaðist mikill hasar á milli manna við bekkina en ekkert alvarlegt og aðeins Andriy Lunin, varamarkvörður Real Madrid, fékk að líta gula spjaldið.

Real Madrid er komið með fimm stiga forystu á toppnum en liðið er með 27 stig en Barcelona með 22 stig.