Albert Guðmundsson skoraði tvö mörk í 4-1 sigri AZ Alkmaar á Rijeka í Evrópudeildinni. Albert var í byrjunarliðinu og spilaði fyrstu 88 mínúturnar í leiknum.

Albert var að skora í öðrum leiknum í röð þar sem hann skoraði einnig gegn Den Haag í hollensku deildinni um helgina.

Fyrra markið í kvöld kom eftir stungusendingu Fredrik Midtsjo á 20. mínútu. Albert gerði vel og kom boltanum framhjá markverði gestanna. Seinna markið kom á 60. mínútu eftir fyrirgjöf frá vinstri. Teun Koopmeiners átti sendinguna sem Albert kom í netið.

Annað skemmtilegt í AZ fréttum í kvöld var það að Mazim Gullit, nítján ára sonur Ruud Gullit, lék sinn fyrsta leik fyrir aðallið félagsins. Maxim kom inn á undir lok leiks í tvöfaldri skiptingu sem Albert var hluti af.