Þeir heimsóttu West Ham United í dag og var staðan markalaus í leikhlé. Liverpool var sterkari aðilinn í fyrri hálfleik en tókst ekki að skapa mikla hættu, Alexander Isak komst næst því að skora en Alphonse Areola varði vel frá honum.

Seinni hálfleikurinn var svipaður þeim fyrri nema að leikmenn Liverpool nýttu hálffærin sem þeir fengu. Isak skoraði sitt fyrsta úrvalsdeildarmark fyrir Liverpool eftir góðan undirbúning frá Florian Wirtz og Cody Gakpo og fékk Lucas Paquetá að líta stórfurðulegt rautt spjald á lokakaflanum.

Paquetá fékk gult spjald fyrir mótmæli en hætti ekki að ausa yfir Darren England dómara sem kallaði í Jarrod Bowen fyrirliða Hamranna og bað hann um að róa liðsfélaga sinn niður. Bowen tókst ekki að sannfæra Paquetá um að hætta og fékk Brasilíumaðurinn annað gult spjald að launum eftir rúmlega mínútu af mótmælum.

Tíu leikmenn West Ham reyndu að gera jöfnunarmark en náðu ekki að skapa mikla hættu. Þess í stað innsiglaði Cody Gakpo sigur gestanna með góðu marki í uppbótartíma.

Liverpool er með 21 stig eftir 13 umferðir, tíu stigum meira en Hamrarnir.

Á sama tíma skoraði Boubacar Kamara eina mark leiksins í sigri Aston Villa gegn botnliði Wolves. Leikurinn var ekki tíðindamikill og verðskulduðu heimamenn að sigra. Villa er í þriðja sæti deildarinnar með 24 stig á meðan Úlfarnir eiga ekki nema 2 stig.

Brighton hafði að lokum betur gegn Nottingham Forest þar sem Maxim De Cuyper og Stefanos Tzimas skoruðu mörkin í nokkuð jöfnum leik.

Bæði lið fengu færi til að skora en Brighton skapaði betri færi og nýtti tvö þeirra.

Brighton er í fimmta sæti eftir sigurinn, með 22 stig. Tíu stigum meira heldur en Forest.

West Ham 0 - 2 Liverpool
0-1 Alexander Isak ('60 )
0-2 Cody Gakpo ('92 )
Rautt spjald: Lucas Paqueta, West Ham ('84)

Nott. Forest 0 - 2 Brighton
0-1 Maxim De Cuyper ('45 )
0-2 Stefanos Tzimas ('88 )

Aston Villa 1 - 0 Wolves
1-0 Boubacar Kamara ('67 )