Man City er að finna taktinn á ný. Erling Braut Haaland og Kevin de Bruyne eru komnir í gírinn og það á hárréttum tíma.

United hefur verið upp og niður þetta tímabilið. Meiðsli Rasmus Höjlund og fleiri lykilmanna höfðu áhrif síðustu helgi, en það verður fróðlegt að sjá hvernig það mætir til leiks gegn England, bikar og Evrópumeisturum Man City.

Chelsea-menn taka stutta ferð á Community-leikvanginn í Lundúnum þar sem liðið heimsækir Brentford á meðan Everton mætir West Ham á Goodison Park.

Fulham og Brighton eigast við á Craven Cottage, Newcastle mætir Wolves og þá fer topplið Liverpool í Skírisskóg þar sem liðið spilar við Nottingham Forest. Jürgen Klopp stillti upp kornungu liði í miðri viku gegn Southampton í bikarnum, en spurningin er hvort lykilmenn verða klárir fyrir þennan leik.

Luton mætir Aston Villa í lokaleik morgundagsins.

Á sunnudag spila Jóhann Berg Guðmundsson og hans menn í Burnley við Bournemouth áður en stórleikur helgarinnar fer fram.

Leikir helgarinnar:

Laugardagur:
15:00 Brentford - Chelsea
15:00 Everton - West Ham
15:00 Fulham - Brighton
15:00 Newcastle - Wolves
15:00 Nott. Forest - Liverpool
15:00 Tottenham - Crystal Palace
17:30 Luton - Aston Villa

Sunnudagur:
13:00 Burnley - Bournemouth
15:30 Man City - Man Utd