„Varnarmaðurinn Kyle Douglas McLagan hefur því miður tekið þá ákvörðun að endurnýja ekki samning sinn við Fram og gengur þess í stað til liðs við Víking í Reykjavík," segir í frétt á heimasíðu Fram.

Kyle sem er 25 ára gekk til liðs við Fram um mitt sumar 2020 frá FC Roskilde í Danmörku og lék hann alls 30 leiki fyrir Fram og skoraði í þeim 5 mörk.

„Knattspyrnudeild Fram þakkar Kyle kærlega fyrir framlag hans til félagsins og óskar honum velfarnaðar í framtíðinni."

Kyle var einn besti leikmaður Lengjudeildarinnar í sumar og valinn í lið ársins. Hann skilur eftir sig stórt skarð í Framliðinu sem leikur í efstu deild á næsta ári.

Víkingar eru með fréttamannafund á eftir klukkan 11:00 en þar mun Sverrir Örn Einarsson, fréttamaður Fótbolta.net, taka viðtal við Kyle McLagan.