Brynjólfur Darri Willumsson lék fyrri hálfleikinn í 1-1 jafntefli Kristiansund gegn Tromsö í fallbaráttu norsku deildarinnar.
Tromsö leiddi eftir nokkuð jafnan fyrri hálfleik en Kristiansund tók öll völdin eftir leikhléð. Kristiansund átti í miklum erfiðleikum með að koma boltanum í netið allt þar til í uppbótartíma þegar vítaspyrna var dæmd.
Kristiansund fékk því stig úr viðureigninni en er áfram á botni deildarinnar, með sex stig eftir sextán umferðir. Tromsö er með sautján stig, einu stigi fyrir ofan fallsvæðið.
Kristiansund 1 - 1 Tromsö
0-1 A. Mikkelsen ('18)
1-1 B. Bye ('94, víti)
Böðvar Böðvarsson lék þá allan leikinn er Trelleborg steinlá gegn toppliði Halmstad í sænsku B-deildinni.
Trelleborg var meira með boltann og fékk fleiri færi en gestirnir frá Halmstad tóku Bödda og félaga í kennslustund þegar kemur að færanýtingu og unnu leikinn með fjögurra marka mun.
Halmstad er með fjóra sigra í röð og sex stiga forystu á toppi deildarinnar á meðan Trelleborg situr í fimmta sæti, einu stigi frá umspilssæti um efstu deild þegar tímabilið er rétt rúmlega hálfnað.
Trelleborg 0 - 4 Halmstad
0-1 A. Johansson ('8)
0-2 I. Jonsson ('67, sjálfsmark)
0-3 V. Dahlstrom ('76)
0-4 A. Johansson ('79)
Að lokum gerði Lommel SK, félag Kolbeins Þórðarsonar, jafntefli í æfingaleik við Dessel.
Dessel 2 - 2 Lommel SK