KR vann 4-2 sigur á Val í 32-liða úrslitum Mjólkurbikarsins fyrr í kvöld. KR komst í 3-0 forystu en Valsmenn náðu að skora tvívegis í síðari hálfleik.
Það er því ljóst að Valsmenn, sem fóru alla leið í úrslit í fyrra, hafa lokið þátttöku í Mjólkurbikarnum þetta árið. Hermann Hreiðarsson, þjálfari Vals, ræddi við Fótbolta.net eftir leik.
Það er því ljóst að Valsmenn, sem fóru alla leið í úrslit í fyrra, hafa lokið þátttöku í Mjólkurbikarnum þetta árið. Hermann Hreiðarsson, þjálfari Vals, ræddi við Fótbolta.net eftir leik.
Lestu um leikinn: KR 4 - 2 Valur
„Þetta eru tvö mörk þar sem er ekki nægilega sterkur varnarleikur. Horn og fyrirgjöf. En í leiknum sjálfum náum við ekki að halda nægilega vel í boltann, okkur vantar samhæfingu og leikæfingu. Við erum að fá menn alla saman í þennan leik sem er alvöru leikur.
Það er kannski stóra svekkelsið. En um leið og við finnum takt í leiknum þá er þetta 50/50 og rúmlega það. Við fáum bestu færin hérna fyrir utan 4-2. Í stöðunni 3-1 þrýstum við aðeins á þá, þannig ég tek margt jákvætt út úr þessu. Það er súrt hvernig veturinn er búinn að vera. Við erum ekki alveg komnir í leikform, þannig þetta var kannski afraksturinn af því.“
Var frammistaðan áhyggjuefni?
„Nei, ekki neitt. Um leið og við breyttum um kerfi, sem við höfum ekki haft tíma til að gera, þá var þetta jafn leikur. Hún er ekki áhyggjuefni. Markið sem við skorum, ef það verður skorað betra mark en þetta í allt sumar skal ég hundur heita.“
Viðtalið má sjá í heild sinni í spilaranum hér að ofan.
