Frestað hjá Guðlaugi og Rooney vegna storms

Stormurinn Darragh mun ganga yfir landið um helgina og hefur því nokkrum leikjum í neðri deildunum verið frestað.

Plymouth stendur við strönd 310 kílómetrum suðvestan við London, höfuðborg Englands. Veðurstofan á Englandi hefur sett gula viðvörun á suðvestur-horn Englands og var ákveðið að fresta leiknum.

Rooney er í heitu sæti hjá Plymouth en talað er um að hann fái tvo leiki til að bjarga starfi sínu. Hann ætti því að vera himinlifandi með að fá meiri tíma til að undirbúa liðið fyrir næsta leik.

Íslenski landsliðsmaðurinn Guðlaugur Victor Pálsson er á mála hjá Plymouth. Hann hefur spilað átta leiki á þessu tímabili og byrjað síðustu tvo leiki liðsins.

Plymouth mætir næst Swansea á þriðjudag en liðið er sem stendur í 21. sæti deildarinnar með 17 stig.