„Þetta var fínasti fyrri hálfleikur, komumst yfir. Ég hefði viljað fá aðeins betri frammistöðu en við tökum þessi þrjú stig," sagði Hallgrímur Jónasson, þjálfari KA, eftir sigur liðsins á ÍBV í Bestu deildinni í dag.
Lestu um leikinn: KA 2 - 0 ÍBV
„Ég hefði viljað að við værum rólegri á boltann og aðeins stærri. Þora að spila aðeins meira, það komu kaflar í seinni hálfleik sem það gerðist en of sjaldan. Erum 1-0 yfir og mér fannst við vera aðeins hræddir við að missa það niður frekar en að elska það að halda áfram að spila og ná inn seinna markinu. Tölfræðin er ágæt en ég er virkilega ánægður með stigin og að halda hreinu annan leikinn í röð. Ég veit að það býr aðeins meira í okkur og það vonandi kemur smám saman."
KA var marki yfir í hálfleik. Það var hins vegar fátt um fína drætti í seinni hálfleik en KA innsiglaði sigurinn í lokin.
„Auðvitað var það léttir. Ég hefði viljað sjá okkur vera aðeins stærri og halda betur í boltann. Þegar Valdimar kom inn á miðjuna fannst mér hann leysa stöðuna vel og kom með smá ró. Það voru margir kaflar sem við hefðum getað nýtt okkur aðeins betur," sagði Haddi.
„Svo verður maður líka að vera heiðarlegur og segja að við erum búnir að tapa þremur heimaleikjum í röð svo það er eðlilegt að það komi smá stress. Eftir tvo sigurleiki vona ég að við tökum skref upp á við. Við vitum að við þurfum að taka nokkur skref. Við vitum að við erum búnir að vera með meiðsli og jafnvel spila meiddum leikmönnum og margir komnir rétt fyrir mót. Ég er virkilega ánægður með að síðustu tveir leikir eru sex stig og við höldum hreinu."
