Gylfi Tryggvason, þjálfari Grindavíkur/Njarðvíkur, var afar sáttur eftir 1-2 útisigur nýliðanna gegn Þrótti í Bestu deild kvenna í Laugardalnum í kvöld. Gestirnir skoruðu tvívegis í fyrri hálfleik og lögðu grunninn að mikilvægum sigri gegn sterku liði Þróttar.
„Bara mjög góð. Fannst við bara drulluflottar í fyrri hálfleiknum, skorum bæði mörkin okkar þá og komum okkur í góða stöðu fyrir seinni hálfleikinn,“ sagði Gylfi eftir leik.
Lestu um leikinn: Þróttur R. 1 - 2 Grindavík/Njarðvík
„Bara mjög jákvæður fyrri hálfleikur og er bara ekki með svörin af hverju við náðum ekki að vera betri í seinni hálfleik. Hlakka til að horfa á þennan leik aftur og finna út úr því.“
Þróttarar sóttu stíft að marki Grindavíkur/Njarðvíkur undir lok leiks og játaði Gylfi að spennan hefði færst yfir á bekkinn þegar leið á síðari hálfleikinn.
„Já það gerði það nú, það er mjög misjafnt hvort það fari eitthvað um mig á bekknum eða ekki en í dag gerði það.“
„Við ætluðum okkur ekki að láta þær skora í dag. En þær náðu því og þær náðu því helvíti snemma í seinni hálfleiknum og það var óþægilegt. Þessi seinni hálfleikur var mjög langur og lengi að líða.“
Þrátt fyrir mikla pressu heimaliðsins í seinni hálfleik var Gylfi ánægður með hvernig lið hans varði teiginn.
„Þær eru með skýran sóknarleik sem gengur bara að mínu viti vel hjá þeim. Þær skapa mjög mikla hættu inn í vítateignum hjá okkur. Við vörðumst því mjög vel í dag fannst mér.“
„Það sýndi sig í seinni hálfleik að þær voru að dæla boltum inn í boxið og ég veit ekki hvað við náðum að skalla mikið af því burt.“
„Ég er bara ógeðslega stoltur af liðinu mínu að koma hérna á erfiðan útivöll á móti virkilega öflugu liði og fara héðan og finnast við hafa átt skilið það sem við fengum út úr leiknum.“
Næsta verkefni Grindavíkur/Njarðvíkur er bikarleikur gegn Val á Hlíðarenda, þar sem liðin mættust einnig í fyrstu umferð Bestu deildarinnar. Þá höfðu Valskonur betur 2-1
„Það eru pottþétt einhverjar í liðinu sem eru með blóðbragð í munninum eftir þann leik, þar sem við vorum bara töluvert sterkari aðilinn í þeim leik.“
„Það hefur verið stígandi hjá þeim, þannig þetta verður allt annað Valslið sem við mætum í bikarnum og vonandi erum við orðnar aðeins betri sjálfar og getum mætt með betra lið en var að spila síðasta leik.“
Sjáðu viðtalið í heild í spilaranum hér að ofan
