Sér mun á yngri leikmönnunum frá síðasta ári
Á landsliðsæfingu í vikunni.
Ræðir í viðtalinu einnig um tímabilið í Grikklandi.
„Ég er vel stemmdur og liðið líka, spenntir, gaman að heyra að miðasalann hefur gengið vel - vonandi verður troðfullur völlur á móti Slóvakíu. Það er gaman að koma heim og reyna búa til þessa gryfju sem Laugardalsvöllur var. Blandan í hópnum er góð og maður sér mun á yngri leikmönnunum frá síðasta ári, þeir hafa stækkað, dafnað og gert góða hluti í sínum félagsliðum. Við erum komnir með rosalega gott lið og við þurfum að spila vel úr þeim spilum sem við höfum," sagði landsliðsmaðurinn Hörður Björgvin Magnússon við Fótbolta.net í dag.
Framundan eru leikir gegn Slóvakíu og Portúgal í undankeppni EM. Fyrri leikurinn er gegn Slóvakíu á laugardag á Laugardalsvelli.
Framundan eru leikir gegn Slóvakíu og Portúgal í undankeppni EM. Fyrri leikurinn er gegn Slóvakíu á laugardag á Laugardalsvelli.
Hörður þekkir ágætlega að spila fyrir framan fullan Laugardalsvöll að sumri til, skoraði á sínum tíma sigurmarkið gegn Króatíu í undankeppni HM.
„Þetta rifjast oft upp fyrir manni, þetta var gott mark og kannski smá heppni með því. Það ýtir og hjálpar okkur að vera með fullan völl. Við þurfum að einbeita okkur að Slóvakíu, þeir eru með gott lið, geta refsað okkur. Ef við spilum okkar leik og nýtum þeirra veikleika, þá ættum við að vera mjög góðir."
„Við höfum fundað og vitum hvað Slóvakíu getur, það eru sterkir leikmenn í hópnum þeirra og þeir þurftu að kalla Marek Hamsik til baka aftur. Við vitum hverjir veikleikar og styrkleikar þeirra eru."
Hópurinn kom fyrr saman þar sem deildirnar í Evrópu voru flestar búnar og náðu margir leikmenn að æfa vikuna áður en landsleikjaglugginn hófst formlega í þessari viku.
„Maður er alltaf tilbúinn í að forgangsraða öllu fyrir landsliðið, koma heim og spila fyrir þjóðina. Það er alltaf plús og gefur okkur svo mikið að koma heim og spila. Það er auðvelt að segja já við hringingu frá þjálfurum."
Hörður Björgvin hefur bæði leyst stöðu miðvarðar og vinstri bakvarðar í landsliðinu en þó meira verið í miðverði að undanförnu. Veit hann í hvaða hlutverki hann verður á laugardaginn?
„Svona næstum því, ég verð allavega í vörninni, ég get sagt þér það. Við höfum rætt taktík sem ég gríðarlega spenntur að prófa og það verður bara spennandi."
„Í liðinu mínu er ég að spila hafsent og mér líður rosalega vel þar, við breytum vörninni þar inni í leiknum í þriggja manna, fáum bakverðina mjög hátt og ég fæ meiri tíma til að fá boltann og rekja hann upp völlinn. Með því næ ég að búa til meira sóknarspil. Í landsliðinu er þetta aðeins öðruvísi, við þurfum að vera þéttir. Mér líður bara vel þar sem ég fæ tækifæri og reyni auðvitað að gera mitt besta þar. Maður þarf að grípa tækifærið þegar það kemur, vonandi grípur maður það aftur," sagði Hörður Björgvin.
Viðtalið í heild sinni má sjá í spilaranum að ofan. Þar ræðir hann um félagsliðið sitt Panathinaikos og fyrsta tímabilið í Grikklandi.
Athugasemdir
