Luton er nýliði á komandi tímabili í ensku úrvalsdeildinni eftir að hafa tryggt sér sæti í deildinni á síðustu leiktíð í gengum umspilið í Championship deildinni.
Heimavöllur liðsins hefur vakið mikla athygli þar sem gestirnir þurfa að ganga í gegnum garða hjá fólki til að komast inn.
Völlurinn er ekki löglegur í úrvalsdeildinni í þeirri mynd sem hann er í dag en félagið vinnur hörðum höndum að laga það sem þarf að laga.
Liðið átti að mæta Burnley þann 19. ágúst í fyrsta heimaleik liðsins í efstu deild en nú er ljóst að honum hefur verið frestað.
„Sameiginlega ákvörðunin um að fresta leiknum er sorgleg, sérstaklega í ljósi þess að byggingarvinnan gengur vel. Það er á réttri leið," segir Gary Sweet framkvæmdarstjóri félagsins.
Sweet segir að það megi lítið útaf bregða svo framkvæmdir tefjist svo eina í stöðunni var að fresta leiknum.
Fyrsti leikur Luton í úrvalsdeildinni verður á AmEx vellinum gegn Brighton þann 12. ágúst.
