„Það er klárlega enginn sannleikur í fréttum sem segja mig á leið til Brighton. Allir sem þekkja mig vita hvað það þýðir fyrir mig að vinna fyrir Nottingham Forest og hversu mikilvægt það er mér. Sérstaklega eftir að hafa tapað nokkrum leikjum, þá skiptir starfið mig enn meira máli," sagði Cooper.

„Það er það eina sem er í huga mér, starfið sem ég vinn hér á hverjum degi. Það tekur nóg af mínum tíma að velta því fyrir mér. Ég hef elskað að vera hér, elska leikmennina, starfsfólkið og borgina. Það er það eina sem er í mínum huga þessa stundina," bætti Cooper við.

Cooper er 42 ára gamall og hafði þjálfað U16 og U17 hjá Englandi auk þess að stýra Swansea áður en hann var ráðinn til Forest á síðasta ári.

Forest er nýliði í úrvalsdeildinni og er í 19. sæti deildarinnar eftir sex umferðir. Næsti leikur liðsins er gegn Fulham á heimavelli annað kvöld.