Það voru tvö Íslendingalið sem áttu leiki í danska bikarnum í dag og skópu þau bæði sigur.
Emilía Kiær Ásgeirsdóttir var í aðalhlutverki er sterkt lið Nordsjælland vann þægilegan sigur gegn B93.
Emilía, sem er fædd 2005 og á tvo A-landsleiki að baki fyrir Íslands hönd, skoraði tvennu í 3-0 sigri til að tryggja Nordsjælland áfram í átta liða úrslitin.
Emelía Óskarsdóttir og stöllur hennar í HB Köge eru einnig komnar í 8-liða úrslit eftir sigur á útivelli gegn Næstved.
Emelía er fædd 2006 og hefur verið í algjöru lykilhlutverki með yngri landsliðum Íslands.
Íslendingalið Bröndby er einnig komið í 8-liða úrslitin eftir sigur gegn Österbro í síðustu viku. Þar gaf Hafrún Rakel Halldórsdóttir stoðsendingu í tveggja marka sigri og er Ingibjörg Sigurðardóttir einnig á mála hjá félaginu.
Athugasemdir
