Mikael var ekki í hóp af því hann er á förum

Luca Gotti, stjóri Spezia, sagði fyrir leikinn í gær að þeir Mikael Egill og David Strelec væru ekki í hópnum þar sem þeir væru á förum. Mál þeirra ættu að skýrast í vikunni.

Spezia er í fallbaráttu í Serie A og fékk félagið tvo miðjumenn á dögunum sem takmarkar þær mínútur sem Mikael gæti fengið með aðalliði félagsins.

Mikael hefur verið orðaður við Roda JC og Sparta Rotterdam í Hollandi og þá hefur ónefnt félag í Serie B áhuga á landsliðsmanninum.

Mikael, sem verður 21 árs í mars, á tíu A-landsleiki að baki fyrir Ísland og hefur komið við sögu í ellefu Serie A leikjum það sem af er tímabils.