Það voru nokkrar íslenskar fótboltakonur sem komu við sögu í leikjum dagsins víða um Evrópu.
Ásdís Karen Halldórsdóttir var í byrjunarliði Braga sem vann 2-1 gegn Rio Ave í 8-liða úrslitum portúgalska bikarsins.
Braga mætir annað hvort Torreense eða stórveldi Benfica í undanúrslitum.
Ragnheiður Þórunn Jónsdóttir, sem fædd er árið 2007, kom þá inn af bekknum í tapi PEC Zwolle gegn PSV Eindhoven í hollenska boltanum.
PSV hafði betur í jöfnum leik í toppbaráttunni og er Zwolle með 21 stig eftir 11 umferðir, fimm stigum frá toppsætinu.
Ingibjörg Sigurðardóttir var í byrjunarliði Freiburg sem steinlá í æfingaleik gegn Hoffenheim og var Hlín Eiríksdóttir ónotaður varamaður í tapi Leicester City gegn Tottenham í enska bikarnum.
Að lokum var Telma Ívarsdóttir á bekknum hjá Rangers í 2-1 sigri í skoska boltanum. Rangers er í öðru sæti deildarinnar, sjö stigum á eftir toppliði Glasgow City.
Braga 2 - 1 Rio Ave
PEC Zwolle 0 - 2 PSV Eindhoven
Freiburg 0 - 4 Hoffenheim
Tottenham 3 - 0 Leicester
Rangers 2 - 1 Hibernian
Athugasemdir
