Brighton og Bournemouth skildu jöfn, 1-1, eftir mikla dramatík í 22. umferð ensku úrvalsdeildarinnar á AMEX-leikvanginum í Brighton & Hove í kvöld.

Marcus Tavernier kom Bournemouth yfir á 32. mínútu með marki úr vítaspyrnu.

Bart Verbruggen braut á Amine Adli í teignum en upphaflega fékk Adli gult spjald fyrir dýfu en eftir skoðun VAR sást Verbruggen koma við Adli og var því gula spjaldið tekið til baka og vítaspyrna dæmd.

Stuðningsmenn Brighton töldu VAR hafa brugðist enn einu sinni á tímabilinu og að Verbruggen hafi varla snert Adli sem hafi þegar ákveðið að kasta sér niður áður en snertingin kom.

Bournemouth fór með eins marks forystu inn í hálfleik sem hefði getað verið stærri enda var liðið með yfirráð stærstan hluta fyrri hálfleiksins.

Brighton pressaði á Bournemouth í þeim síðari og náði inn jöfnunarmarki í gegnum hinn 18 ára gamla Charalampos Kostoulas sem gerði sitt annað deildarmark á tímabilinu, en hann kom inn af bekknum og skoraði með laglegri hjólhestaspyrnu. Varamenn Brighton hafa skorað níu deildarmörk á þessu tímabili, meira en öll önnur lið í deildinni.

Dramatískur endir í Brighton en líklega sanngjörn niðurstaða.

Brighton er í 12. sæti deildarinnar með 30 stig en Bournemouth í 15. sæti með 27 stig.