England: Brighton skoraði þrjú gegn Newcastle

Newcastle tók á móti Brighton í enska boltanum í dag og spiluðu gestirnir frábæran fótbolta.

Neal Maupay setti tvennu á fyrstu sjö mínútum leiksins. Fyrst skoraði hann úr vítaspyrnu eftir klaufalega tæklingu Allan Saint-Maximin innan vítateigs og svo skoraði hann eftir góða fyrirgjöf frá Leandro Trossard.

Brighton var við stjórn allan tímann þar sem heimamenn í Newcastle hæfðu ekki rammann einu sinni í rúmar 90 mínútur.

Aaron Connolly gulltryggði sigur Brighton á lokakaflanum eftir sendingu frá Maupay.

Yves Bissouma fékk að líta beint rautt spjald fyrir háskaleik eftir að VAR greip inní. Bissouma sparkaði í andlitið á Jamal Lewis, bakverði Newcastle, og var rekinn af velli.

Bæði lið eru með þrjú stig eftir tvær umferðir.