Boro-liðið hefur litið vel út á þessu tímabili en það lenti í smá hremmingum í byrjun leiks er Tomas Rigo kom heimamönnum í Stoke yfir.

Stoke hélt í forystuna fram að hálfleik en Boro stillti saman strengi og jafnaði þegar tæpar þrjár mínútur voru liðnar af síðari hálfleiknum með marki frá Alan Browne sem var að eiga frábæran leik í bakverðinum.

Hann skoraði ekki bara jöfnunarmarkið heldur átti hann stórkostlega fyrirgjöf tíu mínútum síðar sem Tommy Conway stýrði í netið.

Vont versnaði fyrir Stoke sem missti Bosun Lawal af velli með rautt spjald. Stoke tókst ekki að koma til baka og var það Boro sem fagnaði mikilvægum 2-1 sigri sem er nú með 52 stig í öðru sæti en Stoke í 8. sæti með 41 stig.

Leo Scienza var hetja Southampton í 1-0 sigrinum á Sheffield United á St. Mary's leikvanginum.

Sheffield United hefur nú tapað tveimur deildarleikjum í röð en Southampton er í 15. sæti með 36 stig en Sheffield í 17. sæti með 32 stig.

Watford bjargaði stigi gegn Portsmouth í 1-1 jafntefli. Adrian Segecic kom Portsmouth yfir þegar tæpar tuttugu mínútur voru eftir en heimamenn í Watford voru fljótir að svara með marki Mamadou Doumbia.

Watford er í 7. sæti með 42 stig og mistókst að komast upp í umspilssæti en Portsmouth í 21. sæti með 29 stig, einu stigi fyrir ofan fallsæti.

Stoke City 1 - 2 Middlesbrough
1-0 Tomas Rigo ('15 )
1-1 Alan Browne ('48 )
1-2 Tommy Conway ('59 )
Rautt spjald: Bosun Lawal, Stoke City ('77)

Southampton 1 - 0 Sheffield Utd
1-0 Leo Scienza ('7 )

Watford 1 - 1 Portsmouth
0-1 Adrian Segecic ('73 )
1-1 Mamadou Doumbia ('79 )