FH og Breiðablik gerðu markalaust jafntefli í fjörugum leik í Kaplarika í Bestu deild karla í kvöld en dómgæslan var einna helst til umræðu í leiknum. FH-ingar léku manni færri stærstan hluta leiks eftir að Davíð Ingvarsson var rekinn af velli á 9. mínútu.

Sigurður Hjörtur Þrastarson, dómari leiksins, reif strax upp rauða spjaldið í byrjun leiks eftir að Davíð fleygði sér í tveggja fóta tæklingu á Ástbjörn Þórðarson.

Eftir það var mikill hiti í leiknum. Steven Lennon fór í bókina með gult spjald þremur mínútum síðar fyrir harða tæklingu.

Anton Ari Einarsson, markvörður Breiðabliks. þurfti svo að hafa sig allan í að verja skot frá Lennon á 18. mínútu og svo varði hann aftur frá Vuk Oskar Dimitrijevic þremur mínútum síðar.

Bæði lið sköpuðu sér áltileg færi en Anton Ari hélt Blikum inn í leiknum og þá vantaði hinn víðfræga herslumun til að klára færin en staðan í hálfleik var markalaus.

Blikarnir sóttu í sig veðrið strax í byrjun síðari hálfleiks og átti Viktor Karl Einarsson þrumuskot utan af velli og í þverslá.

Þegar rúmar tuttugu mínútur lifðu leiks braut Guðmundur Kristjánsson á Degi Dan Þórhallssyni í D-boganum. Sigurður Þröstur ætlaði að spjalda hann en hætti síðan við. Guðmundur var á gulu spjaldi fyrir brotið og slapp þarna með skrekkinn.

Dómgæslan var mikið til umræðu en Sigurður Hjörtur átti erfitt með að ná stjórn og voru nokkur vafaatriði í leiknum þar sem í sumum atvikum var hagnaði beitt en öðrum ekki. Níu spjöld fóru á lofti og þar með talið rauða spjaldið sem Davíð fékk í leiknum.

Viktor Örn Margeirsson komst nálægt því að koma Blikum yfir á 73. mínútu er Jason Daði Svanþórsson átti laglega sendingu inn fyrir en Viktor skóflaði boltanum yfir markið úr dauðafæri.

Mörkin komu aldrei í Kaplakrika og skildu liðin jöfn, 0-0. Blikar eru áfram á toppnum með 35 stig en nú á Víkingur mögulega á að saxa á það forskot á meðan FH er í 9. sæti með 11 stig.

Síðan Eiður Smári Guðjohnsen tók við FH hefur liðið tapað tveimur og gert þrjú jafntefli í deildinni en eini sigur hans með liðið var gegn ÍR í bikarnum.