England: West Ham náði jafntefli gegn Man City

Þetta var í fyrsta skiptið í þrjú ár sem Pep Guardiola, stjóri City, stillir upp sama byrjunarliði í tvo leiki í röð.

Heimamenn byrjuðu betur og komust yfir á 18. mínútu. Michail Antonio skoraði þá glæsilegt mark með bakfallsspyrnu, óverjandi fyrir Ederson í marki gestanna.

City var meira með boltann en gekk illa að skapa sér færi í fyrri hálfleiknum. Guardiola tók Sergio Aguero útaf í hálfleik og setti inn Phil Foden.

Foden var ekki lengi að setja mark sitt á leikinn en á 51. mínútu fékk hann sendingu frá Joao Cancelo og kláraði hann færið vel. Í kjöfarið sótti City meira og heimamenn beittu skyndisóknum.

Í uppbótartíma komst Mahrez í hörku færi sem Fabianski varði í stöngina og útaf. City reyndi allt sem það gat til þess að skora en það tókst ekki.

Niðurstaðan því 1-1 jafntefli á London Stadium.