ÍBV bar sigur úr bítum gegn FH í Pepsi-deild kvenna, 3-1 í kvöld. Jón Ólafur þjálfari ÍBV var ánægður með sigurinn og taldi þetta vera sanngjarnan sigur.
Lestu um leikinn: FH 1 - 3 ÍBV
,,Við fengum frekar óvænt á okkur markið. Stórglæsilegt mark. En við héldum skipulagi og héldum haus og það var vendipunktur að ná að jafna fyrir hálfleik," sagði Jón Óli þjálfari Eyjastelpna.
ÍBV hefur átt í erfiðleikum með FH í undanförnum leikjum og Jón Óli var farinn að hugsa til þess þegar FH komst yfir,
,,Ég hugsaði "Jájá, svona er þetta bara. Ég kem aldrei hingað og vinn". En sem betur fer er þetta ekki álög," sagði Jón Óli léttur í bragði.
,,FH átti stangar skot í seinni hálfleik en ég held að það hafi verið eina marktækifæri þeirra í þeim hálfleik. Shaneka fer tvisvar til þrisvar sinnum ein gegn markverði þeirra í seinni hálfleik svo ég held að þetta hafi verið algjörlega sanngjarn sigur," og talandi um færin sem Shaneka fékk í leiknum, þá er þetta ekki nýtt á nálinni hjá henni, hún skorar vissulega mörk en þarf til þess ansi mörg færi og því er Jón Ólafur sammála.
,,Þessi andskoti frá Jamaíka er óúreiknanleg. Hún skilur ekki sjálfan sig og hvað þá við hin. Það er vonandi að færanýtingin hjá henni fari að lagast hjá henni.
Viðtalið við Jón Ólaf er hægt að sjá í heild sinni í sjónvarpinu hér að ofan.
