Þór vann góðan sigur á Gróttu í Lengjudeildinni í dag en þetta var fyrsti sigur liðsins í rúman mánuð.
„Mikilvægt fyrir okkur, langt síðan við höfum unnið leik og við komum okkur aftur þangað sem við höfum verið að stefna á, aftur í umspilssæti," sagði Láki.
Lestu um leikinn: Þór 3 - 1 Grótta
„Mér fannst Gróttu menn byrja betur, þetta var rosalega opið. Það var mikið af opnunum og færum en vantaði gæði hjá báðum liðum á síðasta þriðjungi. Annað markið kláraði leikinn, skorum í byrjun síðari hálflleiks og mér fannst við miklu betri aðilinn í síðari hálfleik," sagði Láki.
Grótta skoraði í kjölfarið á innkasti.
„Þeir eru gríðarlega hættulegir í uppsettum atriðum og ógnuðu eingöngu þannig þannig þetta var bara sanngjarnt."
Elmar Þór Jónsson verður væntanlega ekki með Þórsurum gegn Leikni fyrir sunnan um helgina þar sem hann snéri upp á ökklann í dag. Leikurinn var stopp í dágóðan tíma á meðan Elmar fékk aðhlynningu.
Láki fékk að líta gula spjaldið á meðan leikurinn var stopp.
„Ég fór inn á völlinn að gefa leikmanni skilaboð því það var allt stopp. það má víst ekki labba inn á völlinn," sagði Láki.
