Erling Braut Haaland skoraði fimm mörk í 6-2 sigri Manchester City á Luton í enska bikarnum í gær og rýnum við nú í helstu tölfræði hans eftir þennan leik.
Þetta er í annað sinn sem Haaland skorar fimm mörk í eina og sama leiknum með liðinu.
Haaland skoraði fimm mörk í 7-0 slátrun á RB Leipzig í 16-liða úrslitum Meistaradeildarinnar á síðustu leiktíð og er hann nú fyrsti leikmaðurinn í sögu Man City til að skora fimm mörk í tveimur leikjum fyrir félagið.
Þá er hann eini leikmaðurinn í sögunni til að skora fimm mörk í bæði Meistaradeild og enska bikarnum.
Norðmaðurinn er kominn með 79 mörk í aðeins 83 leikjum með Man City frá því hann kom til félagsins fyrir einu og hálfu ári, sem eru 30 mörkum meira en næsti leikmaður í ensku úrvalsdeildinni. Mohamed Salah, leikmaður Liverpool, kemur næstur með 49 mörk.
Athugasemdir
