Franski miðvörðurinn Ibrahima Konate verður ekki með Liverpool gegn Manchester City er liðin mætast í stórleik umferðarinnar í ensku úrvalsdeildinni á Anfield á sunnudag. Óttast er að hann missi af mörgum leikjum vegna meiðsla.
Konate meiddist á hné í 2-0 sigri Liverpool á Real Madrid á miðvikudag eftir baráttu við Endrick.
Varnarmaðurinn kláraði leikinn og gat hjálpað liði sínu að vinna fimmta leikinn í Meistaradeildinni á tímabilinu og koma því í útsláttarkeppnina.
Frakkinn hefur myndað magnað miðvarðarpar með Virgil van Dijk síðustu ár. Á þessu tímabili hefur liðið aðeins fengið á sig átta mörk í ensku úrvalsdeildinni og eitt í Meistaradeild, sem sýnir mikilvægi þeirra í vörninni.
Liverpool neyðist til að vera án hans í stórleiknum gegn Manchester City um helgina og gæti þá misst af fleiri leikjum í þessum mánuði, en þetta segir Paul Joyce hjá Times.
Jarell Quansah eða Joe Gomez mun væntanlega leysa hann af hólmi. Báðir hafa spilað rúmar 200 mínútur á þessu tímabili.
Liverpool er með átta stiga forystu á Man City eftir tólf umferðir.
Athugasemdir
