Hólmfríður Magnúsdóttir landsliðskona skoraði tvö mörk í 3-1 sigri Íslands gegn Noregi í undankeppni EM kvenna í dag. Hún var að vonum hæstánægð með stigin þrjú í þessum mikilvæga leik á Laugardalsvellinum.
Lestu um leikinn: Ísland 3 - 1 Noregur
„Auðvitað erum við sáttar með að leggja Norsarana af velli í dag. Það var markmið okkar að ná í þrjú stig og við gerðum það á glæsilegan hátt,“ sagði Hólmfríður við Fótbolta.net.
„Við vorum eiginlega bara mjög góðar í fyrri hálfleik og náðum að skapa okkur mikið af færum. Þetta datt kannski aðeins niður hjá okkur í seinni hálfleik en við náðum að klára þetta mjög vel í dag. Baráttan var alltaf til staðar og við sýndum það að við ætluðum að landa þremur stigum í dag. Ég er bara ánægð með stelpurnar, hvað við lögðum mikið á okkur.“
Hólmfríður var ánægð með mætinguna á völlinn og vonast til þess að enn fleiri láti sjá sig í næsta leik gegn Belgíu á miðvikudaginn.
„Það er líka frábært hvað það mættu margir á völlinn í dag, ég vona bara að fleiri mæti á miðvikudaginn til að styðja okkur.“
