Oft vill verða í svona leikjum að meira verði um baráttu en frá fyrstu mínútu var boltinn að rúlla milli manna í báðum liðum og hélst allt til enda.

Jafnræði var með liðunum í fyrri hálfleik en einungis eitt mark leit dagsins ljós.  

Það kom á 36.mínútu leiksins og þar kom Javier Lacalle til skjalanna þegar hann kláraði sitt færi vel framhjá markmanni Þróttar.  Þannig hélst staðan í hálfleik.

Í síðari hálfleik náðu Þróttarar smátt og smátt yfirhöndinni og náðu að skapa sér færi og hálffæri án þess þó að skora.  Selfyssingar voru þó alltaf skeinuhættir og fengu líka sín færi.

Síðustu 15 mínúturnar  færðu Selfyssingar sig svo aftar á völlinn og lokuðu enn frekar á sóknarleik Þróttara sem misstu eilítið þolinmæðina sem hafði einkennt þá allan leikinn og fóru að spila meira löngum boltum.

Selfyssingar fögnuðu vel þegar Gunnar dómari flautaði til leiksloka, vel studdir af öflugri stuðningsmannasveit, enda má telja líklegt að með þessum sigri og tapi KF í dag séu þeir svo gott sem búnir að tryggja sér veru í 1.deild sumarið 2014.