Ramon Torrijos Anton er leikmaður 15. umferðar í 2. deild karla en hann var frábær á miðjunni hjá Ægi í ótrúlegum 4-3 sigri liðsins á Sindra. Anton skoraði eitt mark og lagði upp annað auk þess að stjórna umferðinni á miðjunni.

„Hann var frábær í síðari hálfleik eins og margir aðrir," sagði Alfreð Elías Jóhannsson þjálfari Ægis við Fótbolta.net í dag. Ægismenn komu til baka í leiknum á laugardag eftir að hafa verið 3-0 undir eftir hálftíma.

„Við áttum fyrstu tíu mínúturnar en síðan gerðist ekki neitt í hálftíma. Við lentum 3-0 undir en Will (Daniels) náði að skora gott mark úr aukaspyrnu og gerðum þetta aftur að leik. Það var bara eitt lið á vellinum í seinni hálfleik og þetta var heldur betur gott comeback," sagði Alfreð en hvað sagði hann í hálfleik?

„Það þarf ekki að öskra eitt né neitt á svona gæa. Þeir vissu upp á sig sökina og náðu að sýna í síðari hálfleik hversu megnugir þeir eru."