„Ég á ekki til orð hvað ég er stoltur af þessum töffurum. Þetta er hrikalega erfiður völlur að spila á og maður sá að þeir voru búnir að læra betur á hann en við. Við gerðum bara það sem við þurftum að gera til þess að vinna og ég tek hatt minn ofan fyrir þessum drengjum, þvílíkir töffarar.“ sagði Úlfur Arnar Jökulsson, þjálfari Fjölnis, eftir sætan 2-1 sigur á ÍA á útivelli í kvöld.
Lestu um leikinn: ÍA 1 - 2 Fjölnir
Skaginn var betri aðilinn í síðari hálfleik, þú hlýtur að vera sáttur með karakterinn í liðinu að ná inn marki í restina.
„Heldur betur. Við vorum búnir að skapa okkar eigin lukku. Maður gerir það með því að vera duglegur og jákvæður. Við héldum bara áfram allan tímann. Auðvitað er smá lukka í þessu en fyrst og fremst er þetta bara vinnusemi og karakter.“
Sigurjón var magnaður milli stanganna í dag, hversu góður var hann í kvöld?
„Stórkostlegur. Hann gerir slæm mistök á móti Þrótti og hann sýnir úr hverju hann er gerður með því að svar því sem var sagt um hann í kjölfarið af þeim leik. Þetta er bara frábær markmaður. Ég bara á ekki orð yfir þennan gæja hann er svo mikill töffari. Hvað segir Klopp alltaf? Hann er svona mentality monster.“
Hvernig fannst þér samt frammistaðan í heild sini?
„Bara geggjuð. Við viljum auðvitað spila skemmtilegan sóknarfótbolta en við gátum það ekki í dag. Við erum með mjög þroskað lið og við getum þetta líka. Við töluðum um það í gær að við sjáum bara til hvað við getum gert. Leikstíllinn okkar var ekki alveg að ganga upp hér. Varnarleikurinn okkar hefur verið góður og við höfum bætt hann gífurlega. Þá snýst þetta bara um að troða in marki. Þessi leikur var bara tekinn á gamla góða berjast, fókus, hlaupa meira en hinir, vera duglegir og sá pakki sko. Við erum góðir í því líka.“
Dofri fer tiltölulega snemma útaf meiddur, veistu eitthvað meira um stöðuna á honum?
„Hann er ekki beint meiddur hann bara fann að hann var mjög tæpur. Hann var hræddur um að meiða sig illa og hann þekkir skrokkinn sinn manna best. Hann var hræddur um að meiðast lengi ef hann myndi halda áfram.“
Þið eigið Gróttu næst á heimavelli, hvernig leggst það verkefni í þig?
„Við ætlum að vinna alla leiki sem við förum í. Alveg sama þótt við vinnum fimm í röð eða töpum fimm í röð, við ætlum að vinna alla leiki. Ég ætla að leyfa mér að njóta í kvöld og svo byrja ég að fókusa á Gróttu á morgun.“
