Tveimur leikjum var rétt í þessu að ljúka í ensku úrvalsdeildinni. Leikið var á King Power leikvanginum í Leicester og Old Trafford í Manchester.

Á Old Trafford lentu heimamenn 0-1 undir þegar Junior Stanislas skoraði eftir að hafa klobbað Maguire og skorað svo með skoti á nærstöng úr þröngu færi. Mason Greenwood jafnaði leikinn tæplega stundarfjórðungi seinna og þeir Marcus Rashford og Antonhy Martial sáu til þess að United leiddi 3-1 í hléi.

Joshua King minnkaði muninn úr vítaspyrnu á 49. mínútu eftir að hendi var dæmd á Eric Bailly. Mason Greenwood og Bruno Fernandes svöruðu því með sitthvoru markinu á næstu tíu mínútum. 5-2 niðurstaðan og þriðji þriggja marka sigur United í úrvalsdeildinni, í röð, staðreynd. United er á þessum tímapunkti fyrir ofan Chelsea sem mætir Watford í kvöld.

Í Leicester unnu heimamenn langþráðan sigur þegar Crystal Palace kom í heimsókn.

Framherjarnir Kelechi Iheanacho og Jamie Vardy sáu til þess að Leicester vann sinn fyrsta leik eftir Covid-hlé og heldur 3. sætinu í deildinni. Bæði mörk Vardy komu seint í leiknum og það seinna í uppbótartíma.

Klukkan 16:30 hefst næsti leikur í úrvalsdeildinni þegar Wolves og Arsenal mætast.