Stuttgart gaf frá sér yfirlýsingu í dag þar sem félagið segir að unnið sé að því að leysa úr málinu í samstarfi við þýska knattspyrnusambandið og yfirvöld. Leikmaðurinn fái allan stuðning frá félaginu.

Sven Mislintat, íþróttastjóri Stuttgart, segir Silas sé fórnarlamb í málinu. Hans fyrrum umboðsmaður lét hann hafa fölsk skilríki þegar hann var til reynslu í Belgíu þegar hann var yngri. Vegabréfsáritun hans var þá að renna út og Anderlecht vildi að hann myndi fara heim til Kongó til að endurnýja hana.

Umboðsmaðurinn sannfærði þá leikmanninn um að hann myndi ekki fá að snúa aftur til Belgíu ef hann færi heim. Í yfirlýsingu Stuttgart segir að nafn umboðsmannsins verði ekki opinberað, til að verja öryggi leikmannsins.

Silas stóð á eigin fótum og setti traust sitt til umboðsmannsins og bjó hjá honum í París en var haldið að mestu frá samfélaginu. Hann hafði ekki aðgang að reikningum sínum né skjölum. Talið er að umboðsmaðurinn hafi skapað nýtt auðkenni fyrir Silas til að rjúfa tengsl hans við fyrrum félag hans í Kongó.

Silas segist hafa lifað í stanslausum ótta undanfarin ár en umboðsmaðurinn hótaði því að hann myndi sjá til þess að Silas myndi ekki spila fótbolta aftur ef hann myndi ekki fara eftir því sem umboðsmaðurinn sagði.

Í yfirlýsingu Stuttgart segir Silas að það hafi verið erfitt skref að opinbera sögu sína. Ráðgjafar hafi hinsvegar sannfært hann um að hann þarf ekki að vera hræddur lengur, hann segist afskaplega þakklátur fyrir traustið og stuðninginn frá Stuttgart.