Að mati Fótbolta.net er samkeppnin hvað hörðust um þrjár stöður í liðinu í dag.

Hægri kantur: Tveir leikmenn berjast um stöðuna í þessum glugga. Það eru Mikael Egill Ellertsson og Willum Þór Willumsson. Willum virtist á síðasta ári vera að negla þessa stöðu en hann hefur ekki verið mjög sannfærandi í síðustu landsleikjum sínum. Það er spurning hvort að hann fái þennan leik til að sýna sig aftur eða hvort að Hareide horfi í Mikael sem er í nokkuð stóru hlutverki hjá Venezia í Serie A. Þriðji kosturinn væri svo að færa Jóhann Berg Guðmundsson út á kantinn en það hefur ekki verið gert í nokkur ár og þykir því mjög ólíklegt.

Á miðjunni með Jóa: Eins og síðustu leikir hafa verið þá er hörð samkeppni milli Arnórs Ingva Traustasonar og Stefáns Teits Þórðarsonar um hvor þeirra spilar við hlið Jóhanns Bergs Guðmundssonar á tveggja manna miðju. Stefán Teitur greip tækifærið í haust þegar Arnór var að stíga upp úr meiðslum og virðist vera hálfu skrefi á undan í dag. Ísak Bergmann Jóhannesson gerir einnig tilkall en út frá síðustu leikjum virðist hann fyrir aftan hina í röðinni. Júlíus Magnússon og Andri Fannar eru svo þar á eftir.

Markmaðurinn: Hákon Rafn Valdimarsson gerði mistök gegn Tyrkjum í næstsíðasta marki leiksins. Vissulega var brotið á Hákoni en ansi klaufalegir tilburðir engu að síður. Elías Rafn Ólafsson, sem bankar hvað fastast á dyrnar, gerði slæm mistök með Midtjylland í síðustu viku. Við spáum því að Hákon, sem hefur ekkert spilað frá leiknum gegn Tyrklandi, haldi sæti sínu.

Við spáum svo að Aron Einar Gunnarsson verði við hlið Sverris Inga Ingasonar í hjarta varnarinnar en Guðlaugur Victor Pálsson kemur einnig til greina.

Vinstri vængurinn velur sig sjálfur og fremstu tveir; Orri Steinn Óskarsson og Andri Lucas Guðjohnsen, halda líklega áfram að spila saman.

Á hættusvæði fyrir leikinn gegn Wales: Logi Tómasson, Mikael Egill og Hákon Rafn eru einu spjaldi frá leikbanni.