Davíð Smári Lamude.
Davíð Þór rotaðist í leiknum.
Þorvaldur var varadómari í dag.
„Við spilum fimmtíu mínútur af lélegum fótbolta, á lágu tempói, lítil hreyfing á liðinu, vorum hálfstressaðir og þetta gekk ekki nógu vel fyrr en við fáum markið í andlitið á okkur. Þá er eins og kvikni á okkur og við byrjum að spila fótboltann sem við erum þekktir fyrir að spila. Það er svekkjandi að fá ekkert út úr þessu," sagði Davíð Smári Lamude, þjálfari Kórdrengja, eftir tap gegn ÍBV á heimavelli í dag.
Lestu um leikinn: Kórdrengir 0 - 1 ÍBV
Sito skoraði eina mark leiksins frekar snemma í seinni hálfleik. Hvað klikkaði í því marki?
Rangstaða í markinu?
„Strákarnir þarna aftast segja mér að þetta hafi verið pjúra rangstaða, ég er ekki búinn að sjá það. Ef svo er þá finnst mér það hrikalega svekkjandi að línuvörðurinn sjái það ekki."
ÍBV er núna sjö stigum fyrir ofan Kódrengi þegar sex umferðir eru eftir. Kórdrengir eiga þó leik til góða og Davíð Smári bendir á að ÍBV eigi fullt af útileikjum eftir.
„Það er engin uppgjöf í okkur, það er alveg klárt mál, þó að það sé margt í þessum leik sem hægt er að benda á sem afvegaleiðir umræðuna þá mættum við ekki til leiks í fimmtíu mínútur. Í svona toppbaráttuleik þá eru fjörutíu mínútur ekki nóg."
Davíð Þór rotaðist í loftinu
Í seinni hálfleik var Davíð Þór Ásbjörnsson, fyrirliði Kórdrengja, borinn af velli eftir að hafa fengið höfuðhögg í einvígi við Halldór Pál Geirsson, markvörð ÍBV. Davíð Þór missti meðvitund og vildu Kórdrengir meina að Halldór hefði hreinlega kýlt fyrirliða sinn.
„Staðan á honum er ekki góð. Hann var alblóðugur í framan og þetta lítur alls ekki nægilega vel út."
„Ég set svakalegt spurningarmerki við það hvort Davíð sé að gjalda fyrir það að hafa verið brotlegur í nákvæmlega eins atriði í síðasta leik. Þetta leit þannig út fyrir mér að hann hafi verið kýldur í andlitið og það er bara víti. Eins og mér er sagt var hann í krítísku ástandi, rotast í loftinu og boltinn heldur áfram á sinni leið. Mér finnst ótrúlegt að það sé hægt að segja að markmaðurinn hafi kýlt boltann. Ég get ekki alveg skilið það."
Hefði viljað alvöru dómaratríó
„Við vissum það alveg að við fáum ekki neitt frá tríóinu og það hefur ekki verið þannig. Mér finnst rosalega skrítið að einn færasti dómari landsins sé hérna sem einhver eftirlitsmaður á þessum leik".
„Ég get með engu móti skilið, þegar það er svona mikið undir og sumir búnir að setja þetta upp sem einhvern úrslitaleik, að það sé ekki hægt að setja bara alvöru tríó á þennan leik sem ræður við pressuna. Ég held að línuverðirnir hafi ekki gert mikið til að hjálpa greyið dómaranum í dag."
„Þetta er eitthvað sem KSÍ ákveður og ég held að það séu ekki margir leikir í gangi akkúrat í dag þannig mér finnst mjög sérstakt að það hafi ekki verið settir vanari dómarar á þennan leik."
Þorvaldur Árnason var varadómari leiksins
Hefðiru viljað fá Pepsi Max-dómara á þennan leik?
„Já, af hvejru ekki? Ég get ekki skilið, ég meina það er Pepsi Max-dómari í einhverri eftirlitsstöðu hérna á vellinum og ég held að þetta sé fyrsti leikurinn sem ég man eftir að það sé maður í þessari stöðu. Mér finnst þetta pínu sérstakt en fyrst og fremst erum við að horfa á að það voru fimmtíu mínútur hjá okkur sem voru lélegar í dag," sagði Davíð Smári.
Arnar Þór Stefánsson dæmdi leikinn og Þorvaldur Árnason var varadómari.
Viðtalið í heild má sjá í spilaranum hér að ofan.
Athugasemdir
