Sam Kerr tryggði Chelsea FA bikarinn

Chelsea vann enska bikarinn eftir svakalegan úrslitaleik gegn Manchester City í dag. Þar var slegið aðsóknarmet á enskan kvennaleik þar sem tæplega 50 þúsund áhorfendur mættu á Wembley.

Sam Kerr tók forystuna fyrir Englandsmeistara Chelsea en Lauren Hemp jafnaði fyrir leikhlé og staðan var því 1-1 í hálfleik.

Man City var betra liðið stærsta hluta leiksins en varnarleikur Chelsea öflugur og skyndisóknirnar stórhættulegar.

Erin Cuthbert kom Chelsea yfir á nýjan leik með glæsilegu marki á 63. mínútu, sem kom gegn gangi leiksins.

City lagði meira í sóknarleikinn eftir það og komst nálægt því að jafna áður en Hayley Raso kom boltanum loksins í netið með jöfnunarmarki á 89. mínútu.

Því var gripið til framlengingar og þar var City betra liðið en gæðin í Sam Kerr gerðu útslagið. Hún slapp gegnum vörn City eftir varnarmistök og skot hennar fór svo af varnarmanni og í netið.

Þetta reyndist sigurmarkið og tvöfaldur sigur Chelsea staðreynd, liðið vann bæði FA bikarinn og ensku deildina.