Liðin eru jöfn á stigum í sjötta og sjöunda sæti deildarinnar, en sjötta sætið gefur öruggan þátttökurétt annað hvort í Evrópudeildinni eða Sambandsdeildinni, á meðan sjöunda sætið getur í besta falli veitt þátttökurétt í Sambandsdeildinni.

Chelsea og Newcastle eru því í harðri baráttu um sjötta sætið, en Manchester United getur blandað sér í þá baráttu með sigri á heimavelli í kvöld.

Meiðslahrjáð lið Rauðu djöflanna fær Newcastle í heimsókn á Old Trafford og er hægt að búast við gríðarlega spennandi slag, en þrjú stig skilja liðin að á stöðutöflunni. Man Utd er með talsvert verri markatölu og þarf því einnig sigur og hagstæð úrslit í lokaumferðinni til að komast í Evrópu - nema að liðinu takist að sigra úrslitaleik FA bikarsins gegn nágrönnum sínum í Manchester City og komast þannig bakdyramegin í Evrópudeildina.

Chelsea heimsækir hins vegar Brighton, sem siglir lygnan sjó um miðja deild en býr yfir skemmtilegu liði sem getur skapað vandræði fyrir lærisveina Mauricio Pochettino.

Leikir kvöldsins:
18:45 Brighton - Chelsea
19:00 Man Utd - Newcastle