FH hefur haldið hreinu í 180 mínútur
Maggý Lárentsínusdóttir, fyrirliði FH, var í skýjunum eftir jafntefli liðsins gegn Íslandsmeisturum Breiðabliks í Pepsi deild kvenna í kvöld.
Lestu um leikinn: FH 0 - 0 Breiðablik
FH-ingar eru nýliðar í deildinni og fögnuðu jafnteflinu vel og innilega eftir leik.
„Þetta er ákveðinn sigur fyrir okkur. Stig á móti Íslandsmeisturunum. Við lögðum upp með að halda markinu hreinu og það tókst. Jeanette er náttúrulega ekki mennsk," segir Maggý og á þar við Jeanette Williams, markvörð FH, sem átti stórleik í kvöld.
FH er eina liðið sem hefur haldið markinu hreinu í báðum leikjum sínum til þessa og segir Maggý að mikil áhersla sé lögð á varnarleikinn.
„Það er ágætis uppskera. Það er það sem við leggjum upp með í leikjum. Okkur var spáð botnbaráttu svo það að halda hreinu er frábært fyrir okkur. Mörkin munu svo koma," segir Maggý.
