Aaron Ramsdale (Arsenal) - Arsenal hefur átt erfitt með að finna markvörð sem hentar liðinu en Crooks segir að Arteta virðist vera búinn að finna sinn fullkomna markvörð í Ramsdale. Ramsdale er frábær einn á einn og hann sýndi það svo sannarlega gegn Brentford. Crooks segir að ef Ramsdale höndlar erfið augnablik vel mun Arsenal vera í toppbaráttu næstu árin.

John Stones (Man City) - Þvílíkt mark! Crooks segir að hann eigi klárlega að vera í enska landsliðshópnum þar sem hann virðist vera eini enski miðvörðurinn sem er að sýna stöðugt góða frammistöðu að undanförnu.

Manuel Akanji (Man City) - Steig varla feilspor gegn Wolves um helgina. Það er ljóst að við munum sjá mun meira af honum í liði Manchester City á leiktíðinni.

William Saliba (Arsenal) - Crooks bjóst við meiru af Brentford og sérstaklega Ivan Toney sem var valinn í enska landsliðið í fyrsta sinn á dögunum. Saliba er stórhættulegur í vítateig andstæðingana og frábær í sínum eigin. Þetta var gönguferð í garðinum fyrir Saliba en Crooks vill sjá meiri anda í Toney.

Jack Grealish (Man City) - Grealish viðurkenndi að gagnrýnin sem hann hefur fengið undanfarið eigi rétt á sér en Crooks segir að frammistaðan gegn Wolves hafi verið sú besta sem hann hafi sýnt í treyju City. Ekki bara ákefðin í að koma sér inn á teiginn heldur var samvinnan með Haaland og De Bruyne eftirtektaverð.

Kevin de Bruyne (Man City) - Þrjú mörk hjá City og tvær stoðsendingar hjá De Bruyne og Wolves gat ekkert gert í því. Frábærar stoðsendingar á Foden og Grealish. Crooks segir að það kæmi sér ekkert á óvart ef stoðsendingarnar hjá De Bruyne verði jafn margar og mörkin hjá Haaland.

Palhinha (Fulham) - Frábært mark í sigrinum á Nottingham Forest. Það er ljóst að Fulham liðið er allt öðruvísi undir stjórn Marco Silva heldur en það var undir stjórn Scott Parker. Liðið þorir að taka af skarið og taka áhættur, nákvæmlega það sem þeir gerðu gegn Forest.

Granit Xhaka (Arsenal) - Crooks segist ekki þola Xhaka, hann sé alltof árásargjarn og pirrandi. En hann hafi verið frábær eins og allt Arsenal liðið gegn Brentford.

Gabriel Jesus (Arsenal) - Um leið og Jesus klæddi sig í Arsenal treyjuna fór hann að spila eins og hann væri andsetinn. Hann er ekki bara að skora mörk, hann spilar frábærlega fyrir liðið, hreyfingarnar á vellinum frábærar og gleðin smitast út í samherjana.

Erling Haaland (Man City) - Í hvert sinn sem hann snertir boltann fer hann í markið. Hann skoraði gegn sínum gömlu félögum í Dortmund en það mark hefur verið mikið í umræðunni og minnt mikið á mark sem Johan Cruyff skoraði á sínum tíma. Crooks er ekki hrifinn af þeirri samlíkingu þar sem markið hans Cruyff var á stærra sviði og útpælt en Haaland hafi bara verið að gera eitthvað. Þá var hann heppinn að skora gegn Wolves þar sem hann hitti varla boltann. En mörk eru mörk.

Heung-Min Son (Tottenham) - Hann er búinn að bíða lengi eftir að skora. Loksins skorar hann þá gerir hann þrennu á 14 mínútum. Virkilega gott fyrir Tottenham að fá hann í gang fyrir grannaslaginn gegn Arsenal á Emirates í næstu umferð.