Chelsea var með mikla yfirburði í fyrri hálfleik en miðvörðurinn Antonio Rudiger kom liðinu yfir með skalla eftir hornspyrnu frá Ben Chilwell fyrrum leikmanni Leicester. Ngolo Kante tvöfaldaði forystuna eftir hálftíma leik.

Chelsea fór með tveggja marka forystu í hálfleik. Brendan Rodgers stjóri Leicester gerði tvöfalda breytingu í hléinu en Kelechi Iheanacho og James Maddison komu inná.

Maddison átti skot sem fór beint á Mendy í marki Chelsea eftir tæplega klukkutíma leik, það var fyrsta skot Leicester að marki í leiknum.

Christian Pulisic kom inná stuttu síðar í liði Chelsea en hann hefur verið að koma hægt og rólega af stað síðan hann meiddist í lok ágúst. Hann skoraði þriðja og síðasta mark leiksins eftir sendingu frá Hakim Ziyech sem kom inná á sama tíma og Pulisic.