Calafiori orðinn leikfær en Saliba ekki

„Mjög jákvæðar fréttir af Riccardo Calafiori og Ethan Nwaneri. Þeir eru mættir aftur til æfinga og eru leikfærir fyrir leikinn eftir að hafa verið frá síðustu vikur," segir Mikel Arteta, stjóri Arsenal.

Varnarmaðurinn William Saliba var ekki með í jafnteflisleiknum gegn Aston Villa í ensku úrvalsdeildinni á laugardaginn. Hann er að glíma við meiðsli aftan í læri.

„Hann er á góðum batavegi. Staðan á honum verður betri með hverjum deginum en þessi leikur kemur aðeins of snemma fyrir hann."

Leikmenn njóta tónlistarinnar
Það vakti athygli fréttamanna að tónlist var spiluð á æfingasvæði Arsenal í dag á meðan leikmenn hituðu upp fyrir æfingu. Arteta var spurður út í þetta.

„Við höfum gert þetta undanfarin ár og er bara hluti af æfingunni. Við notum tónlist til að byggja upp orku og leikmenn njóta þess," sagði Arteta.

Leikur Arsenal og Dinamo Zagreb verður klukkan 20:00 annað kvöld.