KF vann ansi þægilegan sigur á Magna í B-deild Lengjubikars karla þennan sunnudaginn.

Franski sóknarmaðurinn Oumar Diouck skoraði fyrsta mark leiksins af vítapunktinum eftir sex mínútna leik, en á 18. mínútu varð staðan 2-0 þegar Aron Elí Kristjánsson skoraði.

Diouck var ekki hættur. Hann kom KF í 3-0 á 27. mínútu og fullkomnaði svo þrennu sína átta mínútum síðar.

Oumar Diouck kom til KF undir lok fyrri félagaskiptagluggans í fyrra og blómstraði með liðinu, skoraði tólf mörk í nítján leikjum. Hann er 26 ára sóknarmaður sem fæddur er í Senegal en er með belgískt ríkisfang.

Það var ekkert skorað í seinni hálfleiknum og lokatölur 4-0 fyrir KF. Flottur sigur þeirra en bæði þessi lið leika í 2. deild í sumar.

KF er með fullt hús stiga eftir fjóra leiki og er búið að tryggja sér sigur í riðli 3 í B-deildinni. Það er því ljóst að KF mun spila í undanúrslitum B-deildarinnar. Magni er með sex stig eftir þrjá leiki. Þetta var þeirra fyrsta tap í Lengjubikarnum.