Kristján eftir undirskriftina í gær.
,,Þetta var þokkalegur leikur af okkar hálfu, gott að halda hreinu og klára leikinn með tveimur mörkum. Við erum bara sáttir en megum alveg spila betur," sagði Kristján Valdimarsson miðvörður Fylkis eftir 2-0 sigur á KV í Reykjavíkurmótinu í kvöld.
,,Þetta voru tvö fín mörk og gott að halda hreinu. Við þurfum bara að halda boltanum betur og byggja ofan á þennan leik og þá getum við gert ágætis hluti. Þetta var leikur á pari og ekkert meira en það."
Kristján var sjálfur að gera nýjan tveggja ára samning við félagið í gær eftir að hafa verið frá í eitt og hálft ár.
,,Ég er virkilega ánægður með samninginn og sérstaklega því ég er að koma úr erfiðum meiðslum og félagið sýnir mér þakklæti með að bjóða mér samning. Ég er mjög ánægður með það. Ég á svolítið í land með að ná alvöru formi en það kemur bara. Það er janúar og nokkrir mánuðir í mót."
Kristján æfði með Breiðabliki í haust og var ekki viss með framtíð sína fyrr en hann samdi í gær.
,,Ég æfði með Breiðabliki og er þakklátur fyrir að fá að æfa með þeim. Ég var að velta fyrir mér að prófa eitthvað nýtt. Það er ágætt þegar maður er að koma úr meiðslum að prufa eitthvað annað. Það var mjög gaman að æfa með Blikum, ég æfði með þeim í mánuð en ákvað á endanum að semja við mitt uppeldisfélag, mig langar að enda ferilinn þar. Ég er virkilega sáttur með dagsverkið."
