Það voru nokkrir Íslendingar sem komu við sögu í leikjum dagsins í Evrópu.
Orri Steinn Óskarsson var í byrjunarliði FC Kaupmannahafnar sem fékk skell á útivelli gegn Nordsjælland í efstu deild danska boltans.
Staðan var 3-0 í leikhlé og minnkaði Orri Steinn muninn í síðari hálfleik áður en Viktor Claesson kom inn af bekknum til að bæta stöðuna enn frekar. Það dugði þó ekki til þar sem lokatölur urðu 3-2 og er þetta fyrsti tapleikur FCK á nýju deildartímabili.
Nordsjælland og FCK eru núna jöfn með 11 stig eftir 6 fyrstu umferðirnar.
Rúnar Alex Rúnarsson er varamarkvörður FCK og sat á bekknum.
Í næstefstu deild var Daníel Freyr Kristjánsson í byrjunarliði Fredericia sem tapaði heimaleik gegn Hvidovre. Fredericia er í þriðja sæti með 12 stig eftir 7 fyrstu umferðirnar þrátt fyrir þetta tap.
Í efstu deild sænska boltans hafði Elfsborg betur í Íslendingaslag gegn Göteborg, þar sem Andri Fannar Baldursson fékk að spila síðustu 20 mínúturnar í 3-1 sigri á meðan Eggert Aron Guðmundsson var ónotaður varamaður.
Kolbeinn Þórðarson lék allan leikinn á miðju Gautaborgar, sem er aðeins tveimur stigum fyrir ofan fallbaráttuna. Elfsborg er í efri hluta deildarinnar, þremur stigum frá Evrópusæti.
Í næstefstu deild áttust Östersund og Skovde AIK við í Íslendingaslag þar sem leik lauk með fjögurra marka jafntefli. Adam Ingi Benediktsson varði mark Östersund í leiknum á meðan Stefan Alexander Ljubicic byrjaði í fremstu víglínu hjá Skovde.
Östersund er tveimur stigum fyrir ofan fallbaráttuna eftir þetta jafntefli á meðan Skovde er í fallsæti, þremur stigum frá öruggu sæti.
Þorri Mar Þórisson var þá ónotaður varamaður í 2-1 tapi Öster á útivelli gegn Gefle. Tapið er skellur fyrir Öster, sem situr í þriðja sæti og er í harðri baráttu um sæti í efstu deild.
Í efstu deild í Hollandi var Rúnar Þór Sigurgeirsson á sínum stað í byrjunarliði Willem II sem gerði jafntefli á útivelli gegn Heracles. Willem er enn taplaust eftir þrjár fyrstu umferðirnar, með fimm.
Að lokum lék Ísak Bergmann Jóhannesson allan leikinn í sigri Fortuna Düsseldorf á útivelli gegn Ulm í næstefstu deild þýska boltans.
Düsseldorf er komið með sjö stig eftir þrjár fyrstu umferðirnar á nýju tímabili eftir að hafa rétt misst af sæti í efstu deild í sumar.
Nordsjælland 3 - 2 FC Kobenhavn
1-0 S. Egeli ('3)
2-0 M. Ingvartsen ('5)
3-0 B. Nygren ('30)
3-1 Orri Steinn Óskarsson ('55)
3-2 Viktor Claesson ('78)
Fredericia 0 - 1 Hvidovre
Elfsborg 3 - 1 Goteborg
Gefle 2 - 1 Oster
Ostersund 2 - 2 Skovde AIK
Heracles 1 - 1 Willem II
Ulm 1 - 2 Fortuna Düsseldorf
Athugasemdir
