FH er fyrsta liðið til að vinna ÍA í sumar. FH var að slá Skagamenn út úr Mjólkurbikar karla.

Sex uppaldir í byrjunarliði FH, fimm hjá ÍA. Góð þróun hjá mínum mönnum þetta árið. #fotboltinet

— Hafliði Breiðfjörð (@haflidib) May 30, 2019

Ekkert mark var skorað í fyrri hálfleiknum en bæði lið fengu tækifæri til að skora snemma í seinni hálfleiknum. Kristinn Steindórsson átti skot í stöngina fyrir FH og Viktor Jónsson fékk dauðafæri hinum meginn á vellinum. Skalli hans fór þó fram hjá markinu.

Á 72. mínútu skoraði varamaðurinn Steven Lennon fyrsta mark leiksins þegar hann kom FH yfir. Lennon hefur verið að glíma við meiðsli í upphafi tímabils og því lítið spilað. Hann skoraði fyrsta markið í þessum leik.

Innan við tíu mínútum síðar bætti Jákup Thomsen við öðru marki fyrir FH. Tveggja marka forysta FH-inga var þó ekki langlíf þar sem unglingalandsliðsmaðurinn Jón Gísli Eyland Gíslason minnkaði muninn fyrir ÍA í næstu sókn.

Jón Gísli jafnaði næstum því fyrir ÍA þegar hann átti fyrirgjöf sem hann endaði í sláni stuttu síðar.

Fleiri urðu þó mörkin ekki og fyrsta tap ÍA í sumar staðreynd. ÍA er á toppnum í Pepsi Max-deildinni. FH fer áfram í 8-liða úrslit Mjólkurbikarsins.

Í kvöld klárast 16-liða úrslit Mjólkurbikarsins með tveimur leikjum.

19:15 Þróttur R. - Fylkir (bein textalýsing)
19:15 Breiðablik - HK (bein textalýsing)