Það var nóg um að vera í Þjóðadeild kvenna í kvöld þar sem stórleikir fóru fram meðal þjóða í A-deild.
Stærstu þjóðirnar rústuðu leikjum sínum í kvöld, þar sem Spánn, Þýskaland, England og Frakkland unnu stórsigra.
Frakkland, sem er í riðli með Íslandi, rúllaði yfir Sviss með fjórum mörkum gegn engu. Stelpurnar okkar mæta Frökkum í lokaumferðinni og þurfa helst sigur til að eiga von í baráttunni um 2. sætið.
Þær frönsku voru komnar í þriggja marka forystu á fyrstu 20 mínútum leiksins.
Spánn rúllaði þá yfir Belgíu í leik þar sem Esther Gonzalez Rodriguez og Athenea del Castillo settu sitthvora tvennuna. Lokatölur 1-5.
Þýskaland skoraði fjögur mörk gegn Hollandi og var Lea Schüller atkvæðamest með tvennu á meðan Agnes Beever-Jones setti þrennu í fyrri hálfleik fyrir England gegn Portúgal.
Englendingar sigruðu viðureignina 6-0 eftir að hafa gert 1-1 jafntefli í fyrri leiknum á útivelli.
Þessi úrslit þýða að Þýskaland er búið að tryggja sér toppsæti síns riðils, en þær frönsku voru löngu búnar að tryggja toppsætið í íslenska riðlinum.
Þá er Spánn í frábærri stöðu fyrir lokaumferðina gegn Englandi þegar þessi tvö stórveldi eigast við í úrslitaleik um toppsæti riðilsins. Spánverjar eru með tveggja stiga forystu og spila leikinn á heimavelli.
Að lokum tapaði Skotland botnslag gegn Austurríki og fellur því niður í C-deildina.
Einnig má nefna að Finnland og Pólland sigruðu síðustu leiki dagsins í B-deildinni. Pólverjar tryggðu sér þannig þátttökurétt í A-deild á meðan Finnar fara í umspil.
Frakkland 4 - 0 Sviss
Belgía 1 - 5 Spánn
Þýskaland 4 - 0 Holland
England 6 - 0 Portúgal
Skotland 0 - 1 Austurríki
Belarús 0 - 3 Finnland
N-Írland 0 - 4 Pólland
Athugasemdir
