Lestu um leikinn: Þór/KA 1 -  2 Fram

Þór/KA tók á móti Fram í seinni leik dagsins í Bestu deild kvenna og fór hann fjörlega af stað. Alda Ólafsdóttir kom Fram yfir strax á þriðju mínútu eftir atgang í vítateignum í kjölfar hornspyrnu.

Þór/KA jafnaði metin með öðru marki eftir hornspyrnu á elleftu mínútu. Í þetta sinn skallaði Agnes Birta Stefánsdóttir boltann í netið beint eftir hornspyrnuna.

Bæði lið áttu góð færi í fyrri hálfleiknum en boltinn rataði ekki aftur í netið. Þór/KA fékk fleiri færi en Fram komst næst því að skora þegar Hulda Björg Hannesdóttir bjargaði á marklínu.

Staðan var jöfn í hálfleik og var síðari hálfleikurinn fjörugur en hvorugu liði tókst að skora fyrr en í uppbótartíma, þegar allt stefndi í jafntefli.

Þór/KA var meira í sókn en Fram fékk einnig hættuleg færi og var það Murielle Tiernan, sem hafði verið mjög lífleg í leiknum, sem skoraði sigurmarkið í uppbótartímanum.

Murielle skoraði eftir laglegt einstaklingsframtak á 93. mínútu til að stela stigunum þremur á Akureyri.

Þetta er afar dýrmætur sigur fyrir Fram sem er í harðri baráttu um sæti í efri hluta deildarinnar fyrir tvískiptingu.

Fram hafði tapað fimm leikjum í röð fyrir daginn í dag.

Þór/KA situr áfram í fimmta sæti deildarinnar með 21 stig eftir 15 umferðir, þremur stigum fyrir ofan Fram sem er enn í neðri hlutanum.

   30.08.2025 16:14

Besta deild kvenna: Öruggt hjá Stjörnunni