Meiðslaáföll dynja á Watford - „Við verðum að halda áfram"

Ismaila Sarr, vængmaður Watford, verður frá í mánuð að minnsta kosti vegna meiðsla á hné. Þessi 23 ára leikmaður meiddist í 4-1 sigrinum gegn Manchester United þann 20. nóvember.

Nú er útlit fyrir að senegalski landsliðsmaðurinn missi af allri jólatörninni og mögulegt er að meiðslin hafi áhrif á þátttöku hans í Afríkukeppninni sem verður 9. janúar til 6. febrúar.

„Auðvitað er erfitt að kyngja þessu. En ég er með góða leikmenn. Ég veit að Sarr er okkur mikilvægur en við verðum að halda áfram," segir Claudio Ranieri, stjóri Watford.

Þetta er ekki eina áfallið sem hefur dunið á Ranieri og hans liði en markvörðurinn Ben Foster verður einnig frá fram í janúar. Hann missti af tapinu gegn Leicester á sunnudaginn vegna nárameiðsla.

Þá meiddist miðvörðurinn Nicolas Nkoulou aftan í læri í lok leiksins gegn United.