Undirbúningur er hafinn, 40 manna hópur hefur verið tilkynntur og eru leikmenn liðsins sem spila erlendis að tínast til landsins. Eyjólfur Sverrisson þjálfari og hans teymi eru með allt á hreinu og fagmannlega er staðið að öllu. Nú er aðeins spurning um að gefa í og að við leikmenn liðsins verður tilbúnir í bardaga þann 11. júní.

Tveir æfingaleikir voru spilaðir í lok marsmánuðar, gegn Úkraínu og Englendingum. Töluvert var um breytingar milli leikja þegar kom að liðsuppstillingu, menn að koma inn eftir A-landsleik og sumir sem þurftu að kíkja í æfingaferðir íslensku liðanna. Margir leikmenn fengu sénsinn gegn Úkraínu og nýttu hann allir afar vel og ljóst að hungrið er til staðar. Lið Úkraínu er rútínerað, vel skipulagðir og gefa fá færi á sér og eiga eflaust eftir að valda usla í riðli B.

Leikurinn gegn Englandi í Preston var síðasti æfingaleikur liðsins fyrir sumarið. Öflugur sigur gegn sterku liði Englendinga sem ætla sér stóra hluti á mótinu. Mikið af góðum punktum sem þjálfararnir og við leikmenn getum tekið út úr leiknum, bæði varnar- og sóknarlega.

Leikmenn liðsins eru staðráðnir í því að gera góða hluti í sumar. Það sem mun fleyta okkur langt er samheldni liðsins og samkenndin innan hópsins. Ég efa að nokkuð lið í keppninni hafi að skipa jafn litríkum persónuleikum eins og okkar lið.

Knoll og Tott fara þar fremstir i flokki, mæta alltaf of seint í mat, missa af flugum og eru vængbrotnir án hvors annars. Þar á ég að sjálfsögðu við Arnar Darra og Björn Bergmann, þeir hafa haldið sektarsjóðnum uppi! Persónulega hef ég miklar áhyggjur af yngra liði hópsins, staðan í leikjum eldri vs. yngri er 12-1 eldri í vil. Það virðist engu máli skipta hvaða keppnir séu i gangi, yngri ná sér sjaldan á strik. Allt hefur verið reynt til að koma þeim til hjálpar en lítið virðist geta bjargað þeim!

Nú er ekki seinna vænna fyrir ykkur kæru lesendur að bóka flug til Danmerkur og aðstoða okkur strákana við að skrifa söguna!

Þangað til næst,
Bjarni Þór Viðarsson leikmaður u-21 landsliðs Íslands