Haaland hefur skorað 33 mörk í 31 leik fyrir land og lið á þessu tímabili og skiljanlega vilja stærstu félagslið Evrópu fá hann í sínar raðir.

Íþróttadeild Bild greinir frá því að aðeins sex félagslið séu á lista Haaland ef hann yfirgefur Dortmund í sumar. Hann vill aðeins fara í algjört toppfélag og að hans mati fellur Chelsea ekki í þann flokk.

Nýlega var sagt frá því að Roman Abramovich þráði að fá Haaland til Chelsea. Það þyrfti um 100 milljónir punda til að kaupa Haaland frá Dortmund en 2022 virkjast 90 milljóna punda riftunarákvæði í samningnum hans við þýska félagið.

Dortmund þarf að komast í Meistaradeildina til að eiga möguleika á því að halda Haaland. Liðið er sem stendur í fimmta sæti, þremur stigum frá fjórða sætinu sem gefur þátttökurétt í Meistarsdeildinni.

Dortmund er á góðri leið með að komast í 8-liða úrslit Meistaradeildarinnar en Haaland skoraði tvö mörk í 3-2 sigri gegn Sevilla í fyrri viðureign liðanna í síðasta mánuði.

Haaland hefur skorað 43 mörk í 45 leikjum fyrir Dortmund síðan hann var keyptur fyrir um 15 milljónir punda frá Red Bull Salzburg í janúar 2020.