Kylian Mbappe verður líklega ekki með PSG þegar liðið fær Lille í heimsókn í frösnku deildinni um helgina.
Mbappe skoraði fyrsta mark PSG í 3-1 sigri á Brest í franska bikarnum í gær en hann meiddist þegar Lillian Brassier varnarmaður Brest braut á honum en varnarmaðurinn fékk sitt annað gula spjald og þar með rautt í kjölfarið.
Meiðslin eru ekki talin alvarleg en líklegt þykir að Luis Enrique stjóri liðsins muni hvíla hann fyrir leik liðsins gegn Real Sociedad á heimavelli í 16 liða úrslitum Meistaradeildarinnar í næstu viku.
PSG er með átta stiga forystu í frönsku deildinni en Lille er í 4. sæti 12 stigum á eftir. Íslenski landsliðsmaðurinn Hákon Arnar Haraldsson leikur með Lille en hefur ekki komið við sögu í þremur síðustu leikjum liðsins.
